Cu la prima tappa siciliana ca si tinni lu 26 di sittèmmiru 2024 a Palermu, siquita dî dati lu 27 di sittèmmiru a Catania e lu 28 di sittèmmiru a Missina, l’ìsula accugghiù li palchi dû Tour Music Fest, cuncursu nternazziunali carattirizzatu di nu furmatu nnuvativu e focalizzatu supra crìscita e sviluppu artisticu, ca prumuvìu cintinara di talenti emergenti ntâ scena musicali europea.
Nasciutu ‘n Italia ntô 2007, lu festival, ora ntâ sò sidicisima edizzioni, vitti nta edizzioni pricidenti la participazzioni di artisti dû calibru di Mahmood, Ermal Meta, Ariete e tanti àutri Duranti lu festival, li participanti pigghiaru parti a workshop ntinsivi, pruvi e spittaculi nta diversi catigurìi musicali, câ pussibbilità di èssiri nutati dê prufissiunisti dû sitturi.
Puru chist’annu, la giuria fu furmata di sperti di lu càlibbru di Beppe Vessicchio, diritturi e prisidenti dâ cummissioni taliana, Francesco Rapacioli, cumpusituri e allinaturi vucali, Paola Folli, cantanti e cullabburaturi di artisti comu Andrea Bocelli, Mina, Pooh e Renato Zero, accussì comu Kara DioGuardi, pruduttrici e cullabburaturi di stiddi ntirnazziunali comu Pink, Bruno Mars, Eminem e Christina Aguilera, e lu rapper Ensi. A iḍḍi ci junceru allenaturi, giurnalisti e àutri prufissiunisti dû sitturi, incaricati di scègghiri li vincituri e uffrìrili opportunità di carrera e premi pristìggiusi, comu borsi di studiu e nu budget di 10.000 euro pi nvistiri ntâ sò carrera musicali.
Lu Tour Music Fest nun fu limitatu a èssiri na sèmplici cuncurrenza: uffrìu nu supportu cuntinuu a l’artisti attraversu cunsulenza, visibilitati, furmazzioni artìstica e spirienzi riali ntô palcu, cu nu cunfrontu direttu cu l’esperti e li cullabburatura dû settori.
La Sicilia, chî sostati a Palermu, Catania e Missina, havi riaffirmatu lu sò mpegnu pi prumòviri li giùvini talenti artistici, sfruttannu la sò antica e ricca tradizzioni musicali e culturali.
