Arristaru sulu 30 jorna nzinu ô mumentu cchiù attintatu e amatu di l’annu, e la cumpagnìa tiatrali “Araldo del Vespro” è pronta pi turnari supra lu palcu cu nu spittàculu ca prumetti di ‘ncantari picciriddi e granni. Lu 15 dicèmmiru 2024 ê 21.00, lu Tiatru Don Bosco Ranchibile di Palermu ospitarà na storia màggica ammintata ntra li nivi ncantusi dû Polu Nord, nu postu unni li sonni pigghiunu furma e la magìa di Natali si pò sintiri nta ogni àngulu.
Trama: Ntô cori dâ storia attruvamu dui elfi, Nick e Stella, nati la notti di Natali. Li dui elfi sunnu ô centru di na prufizzìa ca annuncia ca unu di iḍḍi sarà distinatu a addivintari lu novu Babbu Natali. Mentri si pripàrunu pi scòpriri lu sò distinu, affròntunu na sèrii di avvinturi divertenti e eventi inaspittati ntâ fabbrica. Ntra li probblemi e li situazzioni divertenti, Nick e Stella ‘mparanu a canùsciri lu sò veru valuri e, supratuttu, lu significatu cchiù prufunnu di Natali: lu rigalu di fari l’àutri cuntenti.
Sta produzzioni non è sulu n’opportunità pi riviviri la magìa di Natali, ma puru n’invitu a riflèttiri supra li valuri dâ cunnivisiuni, di l’amicizia e di l’amuri ca carattirizzanu sta festa. Lu spittàculu prumetti di èssiri n’espirienza ‘ndimenticabbili, capaci di coinvolgiri e divertiri, purtannu ntô palcu la biddizza dî tradizzioni di Natali.
La dirizzioni è affidata a Giuseppe Bongiorno, laureatu nta l’arti dô spittaculu dô Teatro Biondo e canusciutu pâ sò capacità di purtari ntô palcu storii cummincenti e ntirissanti ca cuntunu la storia dâ nostra amata terra.
Pi prenotari lu bigliettu si pò cuntattari lu nùmmaru ô 3892996221
Costu dû bigliettu: €8
