Di lu 26 di jinnaru ô 12 di frivaru 2025, Catania sarà lu prutagunista di n’eventu ca ammisca l’arti, lu sacru e la tradizzioni. La mustra di gruppu “Agata: Sacred Lines“, uspitata ntô novu spazziu multifunziunali SCALO, situatu ntâ mpunenti Vecchia Dogana dâ cità di l’Etna, farà cilibbrari lu cultu di Sant’Àjta, una dî cchiù significativi e vinirati cchiù fiuri dâ cultura siciliana.
Ntra li 27 artisti lucali cuinvolti, ci sunnu nomi canusciuti comu Andrea Parisio, Angelo Crazyone, Chiara Abramo, Igor Scalisi Palminteri, e tanti àutri, ca cuntribbuirannu a cuntari lu cultu di Sant’Àjta attraversu linguaggi visivi ùnici e nnuvativi, nta nu dialugu ntirissanti tra lu passatu stòricu e l’evoluzzioni dâ cultura urbana cuntimparània.
La mustra esplorarà lu sò cultu attraversu lu filtru dâ criatività cuntimpurània, dannu vita a na sèrii di òpiri ca vannu dâ pittura ô muralismu, dâ scultura ô collage. Ogni artista sarà chiamatu a affrontari la ricca immagginazzioni ca gira ntunnu â figura di Sant’Àgata, suttaliniannu na narrazzioni ca, puru si è radicata ntô passatu, metti ‘n dubbiu lu prisenti e lu futuru.
SCALO, graputu ufficiarmenti lu 24 di jinnaru 2025, rapprisenta un centru dinàmicu e nnuvativu pi l’arti e la cultura siciliana. Lu spazziu è pruggittatu pi ospitari mustri, eventi culturali e pruggetti di spirimentazzioni artistica. Lu pruggettu architittònicu, curatu di Sofia Privitera e Gregoriu Mattia Polizza Favaloro, cummina abbilitamenti la cunsirvazzioni dû patrimoniu stòricu câ mudernità.
L’idea arrè a SCALO è chiḍḍa di èssiri nu puntu d’incontru pê cittadini, turisti e prufissiunisti, nu postu unni li tradizzioni lucali e li nfluenzi glubbali s’intriccianu attraversu l’arti e la criatività. Cû sò design all’avanguardia e l’atmosfera accuglienti, SCALO voli èssiri nu catalizzaturi pi novi formi di espressioni culturali, nu veru labburatoriu di idee.
Di spaddu a la nizziativa c’è lu travagghiu di dui ntitati culturali ca, dû 2012, s’impegnàru pi prumòviri la criativitati giuvanili siciliana: Urban Street Art Sicily, funnata di Enrica Ciulla, e l’Associazione Culturale Mansourcing. Tutti dui prumòvunu l’arti comu strumentu pô dialugu e pâ rigginirazzioni suciali, uffrennu na piattaforma ê giuvini artisti e cullettivi emergenti.
