The Odissey, lu pròssimu film assai attesu di Christopher Nolan, vidirà arcuni dî sò sceni girati ‘n Sicilia. Lu rigista ingrisi, canusciutu pi òpiri icònici comu “Inception“, “Interstellar” e “Oppenheimer“, sta vota affronta unu dî miti cchiù cèlibbri dâ storia: l’Odissea di Omero. Pi dari vita â sò visioni epica, scigghiùu na para dî posti cchiù suggittivi di l’Italia. Ntra chisti, l’ìsula di Favignana e, secunnu arcuni funti, macari l’Ìsuli Eoli.
Li riprisi in Sicilia accuminzarannu tra circa dui misi e pigghiaru nu cast stellari. Lu cast cunfirmatu cumprenni Matt Damon, Tom Holland, Anne Hathaway, Zendaya, Lupita Nyong’o, Robert Pattinson e Charlize Theron. The Odyssey prumetti di èssiri nu pruggettu ambizziusu, giratu cu li tecnologgìi IMAX cchiù avanzati pi òffriri n’espirienza cinimàtica senza pricidenti. Secunnu l’esperti, la scelta dâ Sicilia nun è casuali: tanti tiurìi dìcinu ca Ulissi putissi aviri tuccatu sti terri duranti lu sò longu viaggiu di ritornu a Itaca.
N particulari, l’ìsula di Favignana, la cchiù granni di l’Egadi, è canusciuta macari comu “l’ìsula dî crapi” e è spissu assuciata a l’episodi narrati nti l’Odissea, unni Ulissi e lu sò equipaggiu si firmaru pi pigghiari pruvvisti. Lu paisaggiu muzzafiatu di l’isula, chê so acqui cristallini e i so grutti, si prisenta pirfettamenti a l’atmusferi mitulòggichi ca Nolan voli ricriari. Ma non sarà l’unicu scinariu: secunnu quarchi vuci, li riprisi putìssiru coinvolgiri puru l’Isuli Eoli, n’àutru arcipèlagu sicilianu di biddizza straurdinaria.
The Odissey è prudutta di Nolan insèmmula a Emma Thomas pi Universal Pictures e è privista pâ pubbricazzioni lu 17 giugnettu 2026. Ntâ l’Italia, la produzzioni è affidata a Wildside, na cumpagnìa di Fremantle, cu Erik Paoletti comu produtturi di lìnia. Chistu novu adattamentu di l’Odissea prumetti di purtari na rintirpritazzioni innovativa dû mitu ntô schermu granni, cu na narrativa affascinanti e visuali straordinarii. La pillìcula sarà girata nna vari banni dû munnu, comu ntô Regnu Unitu e ntô Maroccu, ma la Sicilia pari èssiri pronta pi jucari nu rolu chiavi nna l’ambientazzioni di chista nova epica cinimàtica.
