La Sicilia si pripara a fari la storia comu prima riggiuni taliana a arriciviri lu pristiggiusu tìtulu di Riggiuni Europea di Gastrunumìa pi l’annu 2025. Stu ricanuscimentu ntirnazziunali, assignatu di l’International Institute of Gastronomy, Culture, Arts and Tourism (Igcat), È nu signu tangibbili di l’alimintari e dû vinu, di l’eccillenza culturali e turìstica di l’ìsula, ca s’ha distintu pâ qualità e la varietà dî sò tradizzioni culinari.
La nutizzia arriva câ “raccumannata” ufficiali di Diane Dodd, prisidenti di Igcat, â fini dû prucessu di valutazzioni. La giuria arricanuscìu la Sicilia comu candidata di straurdinaria ccillenza, suttaliniannu l’àuta qualità dî sò prudutti lucali, la varitati di spirienzi gastrunòmichi uffruti e la ricchizza culturali ca carattirizza l’ìsula. ‘N particulari fu apprizzatu lu dossier prisintatu, ca misi n evidenza la forza dû sistema alimintari e vinìcu sicilianu, nzèmmula ê risurtati pusitivi dâ vìsita di valutazzioni ca s’eppi ntê vari fasi di l’ìsula.
La cannidatura siciliana vinni lanciata ufficiarmenti duranti la Vinitaly 2023 e vitti lu cuinvolgimentu dû Dipartimentu di l’Agricultura, guidatu di Dario Cartabellotta. La nizziativa fu gistuta e prumuvuta dû Consorzio Dos Sicilia, cû chinu sustegnu dû Consorzio di Tutela dei Vini della Doc Sicilia, dû Consorzio del Cioccolato di Mòdica e dî scoli arberghieri lucali. St’attura hannu travagghiatu ‘n sinergìa pi purtari fora l’unicitati dâ cucina siciliana e lu sò culligamentu prufunnu cû tirritoriu, dî vigni ê tradizzioni pasticcirìa, passannu pi l’ogghiu d’aliva e li piatti tìpici ca cùntanu la storia millinaria di l’ìsula.
Ora, la Sicilia è pronta p’affruntari lu passu finali p’uttèniri furmarmenti lu tìtulu chi grapirà novi oppurtunitati a liveddu ntirnazziunali, purtannu l’ìsula ancora cchiù ô centru dû turismu glubbali e dî rutti alimintari e vinichi. Lu prèmiu, nfatti, nun sulu celebbra la gastrunumìa, ma prumovi puru la ntigrazzioni tra arti, cultura, turismu e tradizzioni lucali, evidenziannu l’autintitizza e la biudivirsitati ca la Sicilia è ‘n gradu di òffriri.
Puntu mpurtanti ca nun sulu arrimegghisci lu patrimoniu alimintari e vinìficu sicilianu, ma rapprisenta videmma na forza mottrici pi l’econumìa lucali, ncuraggiannu lu turismu e la ntirnazziunalizzazzioni dî prudotti tìpici di l’ìsula. Cu l’assignazzioni di stu tìtulu pristiggiusu, la Sicilia s’addimostra nun sulu nu locu di straurdinaria biddizza naturali, ma puru na capitali gastrunòmica pronta a maravigghiari lu munnu.
