N’unnata di mùsica, tiatru e ballu sta pi trabbuccari lu cori di Palermu. Duminica 9 frivaru accumincia lu #BonocoreClub, l’eventu ca trasfurmarà lu Palazzo Bonocore nta nu centru culturali nzinu a l’istati. Lu festival s’apri cu “Non siamo pesci tour”, n’esibbizzioni live di Chris Obehi e Fabrizio Malerba, nu cuncertu ca unisci gèniri e lingui pi cuntari la storia di l’incontru tra culturi.
Curatu di CoopCulture cu Genìa e l’associazzioni Kangaroo, lu festival offrirà spittàculi giovedì e dumìnica. N particulari, la musica accumincia ê 18.30, mentri lu tiatru accumincia ê 19.30. Inoltri, lu venniridìa sarà didicatu ê riunioni littirari di #BonocoreLegge, cu l’ingressu gratuitu.
L’eventu d’apertura, “Non Siamo Pesci Tour”, offrirà n’espirienza musicali unica. Nfatti, Chris Obehi e Fabrizio Malerba purterànu supra lu palcu nu miscugghiu di Afrobeat, Afro funk, Reggae e tradizzioni siciliani. Lu set ‘ntimu e ntirissanti vidirià Obehi altirnari tra chitarra, ukulele e vuci, ca vannu di l’inglisi ô pidgin, di l’italianu all’esan. Lu ripirtoriu cumprenni canzuni dû primu album di Obehi, “Obehi”, lu sìngulu “Otiloh”, oltri ca canzuni inediti e tribbuti a Rosa Balistreri.
Doppu lu dibuttu musicali, lu festival cuntinuarà giovedì 13 frivaru cu “Ultima chiamata | Cervello in fuga” di Dario Muratore, nu monòlugu ca affronta li difficultà di chiḍḍi ca lassanu la sò patria ‘n circata di nu futuru n’àutra banna. Inoltri, dumìnica 16 di frivaru sarà lu turnu di “La voce delle donne”, nu recital di Manutsa ca celebbra la fimminilità siciliana attraversu la musica, lanciannu nu missaggiu forti contra la viulenza di gèniri.
Lu prugramma di frivaru cuntinuarà cu “Franca e Leona”, nu spittàculu tiatrali cu Italia Carroccio e Lia Ceravolo (20 di frivaru), lu cuncertu di PalermoCoroPop (23 di frivaru) e l’esibbizzioni di ballu cuntimpuràniu “Dialogo a giorno” (27 di frivaru).
Cu nu prugramma eclètticu, #BonocoreClub prumetti di èssiri nu puntu di rifirimentu pâ scena curturali palirmitana. Nfatti, lu pùbblicu sarà capaci di scopriri novi talenti e artisti affirmati nta nu cuntestu unicu.
Li biglietti pî spittàculi custanu 10 euro e cumprennunu na bevanda. N’opportunità pirfetta pi immergirisi nta l’arti e la cultura ntô cori di Palermu.
