Un capitulu novu dâ tradizzioni siciliana sta pigghiannu vita grazzi â sinirgìa tra La Cademia Siciliana e Ylenia Pia Tomasello, illustratrici e studiusa di storia di l’arti bagheriana. Lu fruttu di sta cullabburazzioni è “Fàvuli Murali”, un libbru chi arricogghi arcuni dî puisìi cchiù significativi di Giuvanni Meli, unu di l’autura cchiù mpurtanti dâ littiratura siciliana di l’Ottucentu.
La Cademia Siciliana s’impegna di anni pi prumòviri e prutèggiri la lingua siciliana e criau nu pruggettu chi si distingui pâ sò pricisiuni linguìstica. Trascrissi l’òpiri di Giuvanni Meli usannu n’ortugrafìa muderna chi rispetta tutti li varianti dû sicilianu.
Lu ntentu dâ Cadèmia è chiaru: dari â lingua siciliana la dignitati ca si mirita, punannu l’arricanuscimentu ufficiali di na lingua chi, ntô cursu dî sèculi, hà attravirsatu mumenti di granni ricchizza culturali e di lotti pâ sò supravvivenza.
“Fàvuli Murali” nun è sulu un libbru di puisìi: è n’òpira chi cummigghia palori e mmàggini, grazzi â maistrìa di Ylenia Pia Tomasello. L’illustraturi nnamuratu dî tradizzioni e di l’idintitati siciliani, pigghiau ispirazzioni dû munnu naturali e animali di Trinacria pi criari disegni ca nun sulu ntèrpritanu li palori di Meli, ma li rènninu tangìbbili, visìbbili, quasi vivi L’armali e la natura ca ispiraru li puisìi di l’auturi addivèntanu puru prutagunisti dî tàvuli ca arricchìsciunu lu vulumi, ammiscannu lu putiri evocativu dâ scrittura cu chiddu di l’arti visiva.
Lu libbru si prisenta perciò comu nu viaggiu nta l’arma siciliana, n’odi â biddizza dâ lingua, dâ natura e dâ storia di l’ìsula. Cu “Fàvuli Murali”, La Cademia Siciliana e Ylenia Pia Tomasello nun sulu cèlibbranu Giuvanni Meli e la sò eredità, ma òffrunu a tutti l’oppurtunitati di scòpriri, riscupriri e apprizzari nu patrimoniu culturali ancora vivu e rispira ntô cori dâ Sicilia.
