Lu Politeama Garibaldi di Palermu òspita lu ritornu ‘n Sicilia di nu granni maistru: Nicola Luisotti. Lu famusu diritturi tuscanu, canusciutu pi la sò ntinzitati e passioni, diriggìrà l’Orchestra Sinfònica Siciliana nta nu cuncertu straurdinariu. Chistu eventu apri la prugrammazzioni d’aprili dâ 65° staggiuni. Ntô prugramma, la munumintali Sinfonia n°9 di Gustav Mahler. Cumposta tra lu 1909 e lu 1910, è l’ùrtima sinfunìa cumplitata dû cumpusituri austriacu. L’òpira unisci lu tema dâ transizzioni dâ vita cu na prufunna riflissioni esistenziali.
L’Eterna malinconia dâ Nona Sinfonia
La Sinfonia n°9 di Mahler è una dî cumpusizzioni cchiù putenti e dulurusi dâ musica sinfònica. In particulari, l’Adagio finali si distingui comu unu dî pezzi cchiù cummuventi mai scritti. Chistu pezzu offri ô pùbbricu n’espirienza unica, cû sonu ca si sciogghi pianu pianu nna na quiete ca arriturna all’eternità. Mahler esplora la fraggilità umana e l’inevitabbilità dâ morti, dannu na visioni prufunna e miditativa di l’esistenza. N’òpira capaci di suscitari emuzzioni ntensi e cuntrastanti.
La dirizzioni di Luisotti junci n’autra diminsioni a chista straurdinaria cumpusizzioni. Lu Maestru diriggìu ntê tiatri cchiù pristiggiusi dû munnu, comu lu Metropolitan Opera di New York e lu Wiener Staatsoper. Purterà la sò padrunanza, dannu â rapprisintazzioni n’energìa unica. Grazzi ô sò stili appassiunatu e ncisivu, Luisotti cunquistò lu pùbbricu ntirnazziunali. L’appuntamentu câ Nona Sinfonia di Mahler rapprisenta n’opportunità ‘npercabbili pi vìviri n’espirienza musicali di liveddu straurdinariu.
Lu cuncertu si farà lu venniridìa 4 di aprili a li 21 e lu sàbbutu 5 di aprili a li 17.30 ô Politeama Garibaldi di Palermu. Li biglietti sunu dispunìbbili ntô tiatru e supra Vivaticket, cu sconti pê studenti e pê cristiani disabbili. Non ti perdiri chistu eventu ca celebbra la musica e la prufunna riflissioni, nta una di l’òpiri cchiù emutivi dô ripirtoriu sinfònicu.
