Palermu è tinta dê culura di Claude Monet, dô 10 nuvèmmiru 2024 ô 28 frivaru 2025, Palazzu Trinacria, câ sò storia e fascinu senza tempu, addiventa scena di n’espirienza straurdinaria immersiva ca porta li spittatura nta l’arti dô maestru dô ‘mprissiunismu.
Ma chista non è la solita mustra; è nu viaggiu unni si trova littiralmenti circunnatu dî culura e di l’atmusferi ca ispiraru Monet, ntra li riflessi dâ luci dâ Sena, li jardina di Giverny e lu muvimentu dû ventu ntra li gigli d’acqua.
L’eventu “L’universu di Monet” non sulu mustra l’òpiri, ma offri nu viaggiu unni li visitaturi addivèntunu parti dâ scena. Attraversu li tecnologgìi avanzati di prujizzioni e di pruggettazzioni sonora, ogni stanza dô Palazzu Trinacria veni trasformata nta nu dipintu, unni ogni passu fa sentiri ô spittaturi comu si fussi nu trattu di pinzellu nta l’universu di Monet.
Lu sonu di l’acqua ca scurri, la luci ca cancia dilicatamenti di l’alba ô crepusculu e la sinfunìa dâ natura criunu na cunnissioni sensuriali unica, traspurtannu li visitaturi dô cori dâ Sicilia â Francia dâ fini dô XIX sèculu.
La spirènzia immersiva non è sulu visiva ma macari emutiva. Li spazzi e li prujizzioni, sincrunizzati cu na culonna sunora avvolgenti, arrinèsciunu a evocari l’emuzzioni ca Monet stissu circau di trasmèttiri attraversu li sò tratti di pinzeḍḍu viloci e li sò culura ntensi. Li spittaturi ponu caminari attraversu la seri icònica di Monet – dê Campi dê Papaveri ê Cattidrali di Rouen ê Gigli d’Acqua di Giverny – taliannu comu sti paisaggi pigghiunu vita câ luci e si trasfòrmunu davanti a l’occhi.
Chi havi a chi fari Palermu cu Claude Monet? A prima vista, la cunnissioni tra la città e l’artista putissi pariri luntana, ma basta approfunniri ntê vicoli e ntê jardini dâ città pi sentiri n’ecu di l’amuri di Monet pâ luci e lu culuri.
Palazzu Trinacria, cu la sò architittura stòrica e lu sò stili clàssicu, offri nu cuntrastu affascinanti a l’esplosioni visiva di l’òpiri di Monet, purtannu fora novi sfumaturi e significati.
“L’universu di Monet” è n’eventu ca arricògghi sia chiḍḍi ca canusciunu Monet ca chiḍḍi ca sunu curiusi di spirimintari na forma d’arti nnovativa e accissìbbili. Pirfetta pê famigghi, pê giuvini e pi chiḍḍi ca volunu spirimintari l’arti nta na manera nova, chista mustra è n’opportunità pi trasiri nta l’anima di l’impressiunismu, scuprennu quantu n’òpira pò diri senza bisognu di paroli.
Pi li palirmitani e li visitaturi dâ città, chista è n’opportunità unica pi vìdiri l’arti nta na manera cumplitamenti diversa e pi sintiri, puru si sulu pi quarchi mumentu, chiḍḍa maravigghia ca Monet sintìu tutta la sò vita pâ biddizza naturali. Palazzu Trinacria, chî sò spazzi stòrichi e architittura, nun fu mai accussì vivu e culuratu comu è ora.
Di lu 10 nuvèmmiru 2024 ô 28 frivaru 2025, l’arti mprissiunista t’aspetta a Palermu, sei prontu a mmergiriti nta l’universu di Monet?
