Nu viaggiu ntô tempu tra tradizzioni e misteri antichi
Immagginati di fari nu saltu arrè ntô tempu, a na Sicilia dâ fini dû XIX sèculu unni lu ramufaru battìa ancora lu mitaḍḍu e lu zabbarinaru tissiva cu pacienza li filamenti di l’agave. Stu viaggiu ntô passatu addiventa rialitati ntâ quarantèsima edizzioni du Presepìu Viventi di Custonaci, ca torna a ‘ncantunari li visitaturi di tuttu lu munnu ntâ suggittiva Grutta Mangiapane.
Non è sulu nu spettaculu di Natali, ma nu veru museu viventi unni cchiù di 150 artisti – assài di chisti articiani autentici – dùnunu nova vita ê prufissiuna ca scumpareru di tantu tempu. Ntra chisti, li pirsunaggi quasi mitulòggichi comu lu “conza piatti e lemmi”, l’artiggianu ca riparava l’oggetti di terracotta, o lu navigaturi, nzèmmula a firrari, carpinteri e cantastori ca pupulanu stu paisi ammucciatu ntâ roccia.
La Grutta Mangiapane: storia e magìa
La storia di stu straordinariu presepìu accumincia ntô 1983, quannu Don Rosario Vanella, allura parrinu dû paisi, appi l’intuizzioni di cilibbrari la missa di Natali nta sta grutta di mill’anni. Di ddu mumentu, chiddu ca era nu sèmprici ritu riliggiusu si trasfurmau nta unu di l’abbinimenti cchiù attintati dû Natali sicilianu, tantu d’èssiri ricanusciutu patrimoniu intangibbili di l’ìsula dû 2006.
Ma la Grutta Mangiapane, canusciuta macari comu “Grutta di l’Uffizi”, cunta na storia assai cchiù antica. Cu la sò mprissiunanti autizza di 70 metri e prufunnità di 50 metri, chista grutta naturali ospitau nsidiamenti umani a cuminciari dô Paleoliticu, comu addimustranu li graffiti e l’artefatti ancora visìbbili. A cuminciari dô 1819, addivintò la casa dâ famigghia Mangiapane, ca custruìu n’interu villaggiu pirfittamenti ntigratu câ roccia.
L’atmusfera è rinnuta ancora cchiù màggica dâ mùsica tradizziunali: piffiti, ciaramelli, chitarri, friscaletti e marranzani jìnchinu l’aria di miludìi antichi, mentri lu prufumu dâ “sfincia” – la tradizziunali cipudda priparata cu farina, latti e patati – si diffunni tra li casi di petra.
Lu successu du Presepìu Viventi è dimustratu dê nùmmari: cchiù di 400 mila visitaturi duranti l’edizzioni pricidenti, cu na media di 10 mila prisenza a staggiuni. N’attrazzioni turìstica ca attirau macari l’attinzioni dû munnu dû cìnima: la grutta havi statu lu tiatru di pruduzzioni comu “Il ladro di merendine” di l’ispetturi Montalbano e “L’inverno dei Leoni” supra la storia dî Florio.
Nfurmazzioni utili pâ visita dû Presepìu Viventi
Li vìsiti, privisti dô 25 ô 29 dicèmmiru 2024 e dô 4 ô 6 di jinnaru 2025, accumìncianu dô centru stòricu di Custonaci, unni nu paìsi di Natali cu mircati e degustazzioni accugghi li visitaturi. Di ccà, na navetta ti porta â grutta, unni pari ca lu tempu s’è firmatu. La spirènzia si svolgi ntra casi, staddi e attelli artiggianali, cu nu panorama ca va dû Munti Cofanu ô mari blu dû Golfu di Èrice, nta n’atmusfera ca sulu la Sicilia cchiù autentica pò òffriri.
Li biglietti, cu prezzi a cuminciari di 12 euro pi l’adulti e di 6 euro pê picciriddi di 4 a 10 anni (gratuiti pê picciriddi nzinu a 3 anni e pê cristiani disabbili), si ponnu accattari direttamenti ntô situ ufficiali www.grottamangiapane.it. Si cunsiglia di prenotari ‘n anticipu.
