L’11 di jinnaru 2025 nun sarà na jurnata urdinaria pâ perla dâ Sicilia: Girgenti si pripara a riciviri lu tistimoni di Pèsaru comu Capitali Taliana dâ Cultura, marcannu l’inizziu di n’avvintura chi prumetti di trasfurmari la città dî Templi nta nu faru culturali dû Miditirràniu. Doppu lu triunfu di Palermu, chi vincìu lu tìtulu di Capitali dâ Cultura Taliana ntô 2018, la Sicilia torna comu prutagunista, cunfirmannu la sò vucazzioni comu terra unni l’arti, la storia e la biddizza s’intreccianu nta n’abbrazzu mill’anni.
Lu pruggettu ca vincìu la giuria, battennu li cuncurrenti dû calibru di Assisi e Spoletu, porta nu tìtulu ambizziusu e puèticu: “Il sé, l’altro e la natura. Relazioni e trasformazioni culturali”. Nu manifestu ca parra di dialogu tra culturi e armonia câ natura, temi ca sunu assai attuali ntê nostri tempi ‘nquieti.
Comu nu mosaicu maistusu, lu prugramma è fattu di 44 pezzi prizziusi ca coinvolgunu non sulu Girgenti, ma s’allunganu finu a Lampidusa e ê cumuni vicini. Ntô centru di tuttu, quasi forza astratta di l’eventu, s’attrova la figura di Empedocle, lu filòsufu ca nna l’antichi Akragas tiurizzava li quattru elimenti – Focu, Terra, Acqua e Aria – comu funnamenti di l’universu.
Sti elementi ancistràli pigghiunu vita ntâ zona di Girgenti: lu focu si manifesta ntâ spittaculari prucissioni a la torcia dâ Mennula ‘n Ciuri, ca ntô misi di frivaru trasforma li vìi dâ città ‘n ciumi di luci e di culturi. La Terra cunta la storia di nu paisaggiu duru ma ginirusu, mentri l’Acqua offri miravigghi naturali, dî praji di Eraclea Minoa nzinu ô paradisu di Lampidusa. Â fini, l’Aria suffia comu nu ventu di rinnovamentu supra na cumunità ca guarda ô futuru cu ditirminazzioni.
Lu Tiatro Pirandello aprirà li danze lu 18 jinnaru cu na cirimònia inaugurali ca prumetti d’incantari. Ma è sulu lu princìpiu: la città si vesti già pî festi, comu dimustra lu video mapping suggistiva ntâ Stazzioni Cintrali ca pruggetta 2600 anni di storia supra li soi mura. Di “Talks nella valle dei templi” ô ALL Festival supra lu tema dâ migrazzioni, nzinu ô tantu attìsu cuncertu di Giovanni Allevi, lu calannariu è chinu di manifistazzioni ca prumèttinu di trasfurmari Girgenti nta nu palcu nternazziunali.
Lu sinnacu Francesco Miccichè guarda cu sicurizza a chista sfida epocali: trasfurmari lu tìtulu pristìggiusu nta nu trampolinu pô futuru dâ città. E mentri l’associazzioni lucali si mubbilitanu pi accugghiiri li visitaturi di tuttu lu munnu, Girgenti si pripara a dimustrari ca la cultura pò èssiri la chiavi pi grapiri li porti di nu novu Rinascimentu.
La città antica ca ‘ncantau Pindaro, accussì tantu ca la difinìu comu “la città cchiù beḍḍa dî murtali”, è pronta a maravigghiari n’àutra vota. Accuminciò lu cuntu arritro: ntô 2025, tutti l’occhi sunnu supra chista gioia miditirrània, unni passatu e futuru ballanu nzèmmula nta nu valzer senza tempu.
