La Sicilia si pripara a dari l’accugghienza a “La notte del Conte Rosso“, ducumintariu diriggiutu di Mari Boonetti e Giovanni Zanotti ca cunta la storia di na traggedia navali scurdàta dâ Secunna Guerra Munniali. Lu film, pruduttu dâ Prodet Production e distribbuitu dâ Emerafilm, si fermarà supra l’ìsula cu tri appuntamenti tra Sarausa e Castelvitranu.
Lu ducumintàriu cunta l’affunnamentu dâ navi ociànica Conte Rosso, riquisitu dû riggimi fascista e affunnatu lu 24 di maiu 1941 fora dâ costa di Sarausa, culpitu di nu tirpidu lanciatu di nu suttamarini ngrisi. Na traggedia ca custau la vita di 1297 surdati taliani, tra cui 60 siciliani, e ca lu riggimi circau di cummigghiari.
L’appuntamenti ‘n Sicilia
Lu tour accuminza lu 22 di marzu ô Cinema Aurora di Sarausa, ê 10:30, câ participazzioni di Antonello Maltese, figghiu di Angelo Maltese chi fotugraficamenti ducumentau lu ricùpiru dî cadaviri, e di Concetta Santangelo, bisniputi di Giuseppe Salluzzo di Castelvitranu, dispersu ntâ traggedia.
Lu ducumintàriu si trasfirisci appoi ô Cinima Marconi di Castelvetranu cu n’appuntamentu duppiu: lu 24 di marzu ê 15:00, nta na proiezzioni didicata ê scoli, e lu 25 di marzu ê 20:30 pô pùbbricu. Ccà sarà prisenti puru Concetta Santangelo, ca arricuogghi li tistimunianzi dî supravvissuti e dî famigghi dî vittimi pi anni.
Nu cuntu ca arriviva attraversu li tistimunianzi
“La notte del conte rosso” havi già vinciutu lu Caorle International Film Festival ntâ sizzioni ducumintària e ricivìu lu patrunatu di l’Istituto del Nastro Azzurro e di àutri assuciazzioni di cummattenti e vitirani.
Lu film è narratu di Luca Bassi e arricogghi tistimunianzi prizziusi, tra cui chidda dû cintinariu Corrado Codignoni, natu ntô 1921 e s’avvicina ê 104 anni, ùrtimu supravvissutu di dda notti tràggica, vitiranu sia dû naufraggiu ca dâ Campagna Russa. Accantu a iddu, li vuci di Marco Montagnani e di Concetta Santangelo, ca ricostrueru sta drammàtica pàggina dâ storia.
Concetta Santangelo, guardianu della memoria
Nasciuta a Castelvitranu nta lu 1968, Concetta Santangelo è n’avvucatu e dô 2013 lu cuntattu pâ pruvincia di Tràpani di l’assuciazzioni stòricu-culturali Lamba Doria. Bisniputi di Giuseppe Salluzzo, pirdutu ntô naufraggiu, dû 2012 arricugghìu tistimunianzi supra l’affunnamentu dâ navi a vapuri.
Lu sò travagghiu la purtau a pubbricari dui libbra: “L’ultimo viaggio del Conte Rosso” (2016) e “I Carabineri del Conte Rosso” (2021). La sò prisenza a li manifistazzioni siciliani offrirà ô pùbbricu storî pirsunali lijati a sta traggedia.
La visioni dî rigisti
“Ci siamo chiesti cosa rendesse unica questa storia” spiegunu li rigista.
“Muovendoci tra le fonti, abbiamo scoperto un sottile filo rosso che unisce tutti i discendenti delle 2500 persone che furono sulla nave quella notte”
Lu ducumintàriu trasmetti lu sintimentu ca liga li famigghi coinvolti: “È un senso di vuoto, è tristezza, è l’elaborazione di un lutto. Sono 2500 vite cambiate in otto minuti. Sono ideali disillusi di soldati di 20 anni che non avevano mai visto il fronte“.
Renni la storia cchiù cummuventi è la littra ca Marino Motta, nu giòvini surdatu ca murìu dda notti, scrissi ê sò ginitura prima di partiri. Na tistimunianza ca, secunnu li rigista, “ti scaraventa sul ponte del Conte Rosso alle ore 20:00 del 24 maggio 1941” e ti fa capiri “cosa sia la guerra e quanto sia importante perseguire la pace“.
N’uccasioni di nun pèrdiri
Li appuntamenti cu “La notte del Conte Rosso” rapprisèntanu n’uccasioni pi riscupriri na pàggina scurdata dâ nostra storia, cu na forti liami cô tirritoriu sicilianu. La prisenza dî parenti dî vittimi farà di chisti proiezzioni non sulu eventi cinimàtici, ma mumenti di riflissioni cullittiva.
N’invitu a nun scurdari, attraversu li vuci di chiddi ca spirimintàru di prima manu o attraversu li storii di famigghia, chiḍḍa notti tràggica dû 1941, quannu lu mari fora dâ costa di Sarausa fu trasfurmatu ‘n cimiteriu pi cintinara di giùvini taliani.
