N’appuntamentu novu cu granni mùsica
Sabatu 15 marzu 2025, lu Tiatru “Gilberto Idonea” dû Polo Culturali di Sant’Àjta Li Battiati ospita lu quartu eventu dâ serii “Note in Teatro 2025“. Prutagunisti dâ sirata sunnu Emilia Zamuner e Massimo Moriconi, nu duo già cunsulidatu ntâ scena jazz italiana, chi pi l’occasioni si trasfurmarà ‘n quartettu cu l’agghiunta di Antonio Petralia a battirìa e Tony Brundo ô chianuforti. L’eventu, ca accumincia ê 21:00, rapprisenta nu palcu mpurtanti ntâ prugrammazzioni culturali dâ staggiuni, ca cuntinua a purtari artisti di granni calibru ntô palcu dô tiatru battiatisi.
Lu festival, diriggiutu artisticamenti di Antonio Petralia cu l’Assuciazzioni Musikante, cuntìnua la sò strata di successu, uffrennu ô pùbbricu sicilianu spittaculi di àutu liveddu e dimustrannu, ancora na vota, comu lu jazz e la mùsica d’auturi attròvanu tirrenu fèrtili nta l’ìsula
La magìa dû duo Zamuner-Moriconi
Lu duo Zamuner-Moriconi rapprisenta n’unioni artìstica di ntinsità straurdinaria. Cu la fòrmula essenziali dâ vuci e dû contrabbassu, li dui musicisti arrinèsciunu a criari n’atmusfera ìntima e ntirissanti, unni lu virtuosismu tècnicu, la melodìa e na suttili vina di ironìa si mischiunu ‘n pirfettu equilìbbriu. Lu sò ripirtoriu va dî standard jazz ê clàssici dâ cantautura taliana, senza scurdari li cumpusizzioni urigginali.
Ntô 2019 lu duo pubbricau l’album “Doppia Vita” pi l’Abeat Records, tistimunianza dû sò percorsu artìsticu cumuni e dâ sò affinità musicali. La prisenza di Antonio Petralia, ca vanta na cullabburazzioni cunsulidata cu Moriconi, e di Tony Brundo ô chianuforti, arricchirà ultiriurmenti l’offerta musicali dâ sirata, prumittennu mumenti di granni ntinsità e criatività.
Dui carrèri straurdinarii
Massimo Moriconi, natu a Roma ntô 1955, è na vera e propria liggenna dû contrabbassu e dû bassu alèttricu ‘n Italia. Ntraduciutu ô strumentu a l’etati di 13 anni e furmatu ô Cunzirvatòriu “Refice” di Frosinone, havi custruitu na carrera mprissiunanti sia ntô munnu dû jazz ca nta chiddu dâ mùsica pop. Cullabburau cu li cchiù granni espunenti dû jazz talianu e ntirnazziunali, di Enrico Pieranunzi a Franco D’Andrea, di Tullio de Piscopo a Danilo Rea, passannu pi stiddi ntirnazziunali comu Lee Konitz, Johnny Griffin e Phil Woods.
Particularmenti mpurtanti fu la sò attivitati nta l’Orchestra dei Ritmi Leggeri della RAI di Roma (1980-1989) e li sò cullabburazzioni cu artisti di lu calibru di Mina, pi cui è statu lu bassista nta tutti li sò pruduzzioni dû 1983, e cu Fabio Concato. Lu sò talentu ci fici varagnari assài prèmii, comu Megghiu contrabbassista e megghiu bassista ntô studiu ntô scrutiniu nazziunali dô Guitar Club dô 1995.
Emilia Zamuner, nata a Napuli ntô 1993, rapprisenta una dî vuci jazz cchiù ntirissanti dâ nova ginirazzioni. Laureata cu 110 cum laude dô Cunsirvatoriu “San Pietro a Majella” a Napuli, appi premi mpurtanti, comu puru lu primu postu ntô “Premio Internazionale Massimo Urbani” ntô 2016. La sò carrera la vitti esibirisi ntê festival pristìggiusi e apriri lu cuncertu di Diana Nagrea Krall all”Arena Flegrea di Nàpuli. Ntô 2019 si classificò secunna ô mpurtanti “Ella Fitzgerald Competition” a Washington, arricivennu granni successu di parti dû pùbbricu e dâ crìtica. Attuarmenti è prufissuri di cantu jazz ô Cunzirvatoriu “Gesualdo Da Venosa” di Putenza.
L’arti di Enricu Panvini ‘n mostra
Comu ora è custumi pâ rassegna “Note in Teatro”, puru chistu eventu sarà arricchiutu macari di na mustra artìstica. Sarà lu turnu dê sculturi di Enrico Panvini, artista capaci di “dari vuci” ô lignu, ‘n particulari a l’alivu sicilianu. Cu sinzibbilità e padrunanza, Panvini arrinesci a purtari fora dô matiriali di lignu furmi e figuri ca parinu già cuntinuti ntô granu naturali dô lignu, nta nu prufunnu dialugu câ natura e li soi sprissioni.
Li pròssimi manifistazzioni dû festival
“Nota ntô Teatro 2025” cuntinuarà cu nu riccu calindariu di eventi ca accumpagnarà lu pùbbricu nzinu â fini di maggiu. Eccu lu prugramma cumpletu di l’eventi ca vennu:
- 29 Marzo 2025, ore 21:00: Alberto Gurrisi & Sicilian Friends, featuring Nico Gori
- 12 Aprile 2025, ore 21:00: Tonino Miano Trio “Luminary”
- 30 Aprile 2025, International Jazz Day: ê 20.45 Duo Improprium, siguitu ê 21.30 dû Cesare Panizzi Trio, vincituri dû Premio Massimo Urbani 2024
- 17 Maggio 2025, ore 21:00: Ada Montellanico 4et “Omaggio A Billie Holiday”
- 31 Maggio 2025, ore 21:00: Mauro Schiavone Trio
Nfurmazzioni e prinutazzioni
Li appassiunati ca volunu assistiri â spittacula dû duo Zamuner-Moriconi ponnu prenotari li posti accattannu li biglietti online attraversu la piattaforma DIY Ticket. Pi chiḍḍi ca non volunu pèrdiri nuḍḍu eventu dâ rassegna “Note in Teatro 2025”, è dispunìbbili puru n’opzzioni d’abbunamentu, sempri ntâ stissa piattaforma.
Buona nutizzia pî prufissuri e pî giuvini: è pussìbbili usari la Carta del Docente e lu Bonus Cultura pi accattari li biglietti, cuntattannu lu sirvizziu didicatu tramiti e-mail. Pi qualegghiè autra nfurmazzioni o chiarimenti, l’Associazzioni Musikante è dispunìbbili sia tramiti e-mail ca tramiti WhatsApp ô nùmmaru 345-7447035.
Nun perdiri la pussibbilità di mmergirisi nta l’affascinanti universu sonoru dû duo Zamuner-Moriconi, nta na sirata ca prumetti emuzzioni autentichi e mumenti di granni musica. Lu Tiatru “Gilberto Idonea” dû Polo Culturali di Sant’Àjta Li Battiati, situatu nta via dello Stadio, vi aspetta pi nu viaggiu attraversu li tanti sfumaturi dâ musica jazz e cantanti-cantauturi.
