N’inizziativa pi la rinascita curturali
La Sicilia si pripara a spirimintari na simana interamenti didicata â sò lingua. Dû 31 di marzu ô 7 d’aprili torna lu “Simana dû sicilianu”, lu festival ntirnazziunali oramai ntâ sò secunna edizzioni ca fisteggia e prumovi l’usu dâ lingua siciliana nta tutti li cuntesti dâ vita cutidiana. La manifistazzioni, ispirata a sìmuli nizziativi europei didicati ê lingui minuritari, havi lu scopu di abbattiri lu stigma ca ancora circunna lu sicilianu e di ncuraggiari lu sò usu sia ntâ vita privata ca pùbbrica.
La manifistazzioni nvita a tutti a participari attivamenti, urganizzannu manifistazzioni o simpricimenti usannu lu sicilianu ntê sò ntirazzioni cutidiani. L’obbiettivu è chiaru: purtari la lingua fora dî mura dumèstichi e ripurtàrila ntâ vita suciali e prufissiunali di l’ìsula, cuntrastannu l’abbannunu prugrissivu ca sta carattirizzannu li novi ginirazzioni.
Picchì addifènniri lu sicilianu è funnamintali
Lu “Simana dû Sicilianu” nascìu di nu prufunnu bisognu culturali e suciali. Nunustanti la ricchizza stòrica e littiraria dâ lingua siciliana, pirsisti ancora oi nu stigma ca limita lu sò usu. Assài genituri nun lu trasmèttunu ê sò figghi, picchì lu cunzìdiranu inadatto pû sò futuru prufissiunali. Ntô locu di travagghiu, lu sicilianu veni spissu cunziddiratu sgarbusu o nun apprupriatu, mentri nta li cuntesti ufficiali comu li tribbunali o li parramenti lu sò usu è praticamenti assenti.
Li cunsiquenzi di stu atteggiamentu sunnu gravi: la maiuranza dî siciliani sunnu analfabbeti ntâ sò lingua matri, e un nùmmaru criscenti di giùvini nun sunnu cchiù capaci di parràrila fluentimenti. Stu finòminu rapprisenta nu puvirimentu culturali mpurtanti pi l’ìsula, ca rischia di pèrdiri n’elimentu funnamintali dâ sò identità.
Lu festival dunca aggisci comu nu baluardu contra sta tinnenza, circannu di raffurzari la trasmissioni ntirginirazziunali dâ lingua e di sustèniri la criazzioni di nu mircatu pi cuntinuti e prudutti n sicilianu.
Dû successu dâ prima edizzioni ê novi manifistazzioni
L’annu passatu, la prima edizzioni di “Simana dû sicilianu” vitti na granni participazzioni, cu cui participaru pirsunaggi di primu pianu dâ cultura siciliana e nummarusi urganizzazzioni. Tra li sustinitura cchiù attivi ci fu l’eurudiputatu Ignazio Corrao, ca pubblicò diversi post e lanciau lu podcast “U Curtigghiu“. Macari àutri pruduzzioni àudiu comu “U Sicilianu o Cinema” e “Comu Veni Si Cunta” hannu cuntribbuitu cu novi episodi didicati a l’abbinimentu.
Lu munnu culturali arrispunnìu cu entusiasmu attraversu la participazzioni dû scritturi e pupularizzaturi Dario Cascio, canusciutu comu “The Sicilian Wanderer“, e di nummarusi urganizzazzioni comu La Cademia Siciliana, l’Accademia della Lingua Siciliana, l’Assuciazzioni AUCLIS, la Kademia du Krivu e lu Gruppo ARB di Messina.
Pî l’edizzioni dû 2025, lu prugramma è ulteriormenti arricchiutu. Oltri a l’attivitati online, verrannu urganizzati eventi di pirsuna pi rafforzari lu sensu di cumunità. N particulari, l’assuciazzioni Trinacria havi prugrammatu dui jorna di riunioni a Palermu pi lu 30 e lu 31 di marzu, uffrennu ê participanti la pussibbilità di vìviri nzèmmula la spirienza dû “Simana dû Sicilianu” e di praticari attivamenti la lingua.
Li novi ginirazzioni e lu sicilianu: la testimonianza di Salvatore Longhitano
Tra li prutagunisti di “Simana dû sicilianu” c’è Salvatore Longhitano, studenti di diciott’anni di Adranu, n pruvincia di Catania. Pueta, auturi di libbra ‘n sicilianu e prufissuri dâ lingua pi furasteri, Longhitano rapprisenta na spiranza pû futuru dâ lingua siciliana.
Pi lu giùvini, lu sicilianu è na parti ntigranti dâ sò vita cutidiana, ma osserva cu prioccupazzioni lu distaccu dî sò pari dâ lingua:
Parlo siciliano con i miei genitori, nonni e fratelli, seppure non sempre. Tuttavia tra i miei coetanei molti non lo parlano perché lo considerano un linguaggio da rozzi oppure un linguaggio che solo chi è cresciuto per strada ha il diritto di parlare.
La sò visioni pô futuru è chiara:
Vorrei vedere un futuro in cui nessuno si vergogna di parlare siciliano e in cui la lingua sia presente ovunque e in ogni contesto. Spero in un mondo pieno di siciliano per i miei fratelli.
Na tistimunianza ca suttalinea la mpurtanza di nizziativi comu lu “Simana dû Sicilianu” pi canciari la pircizzioni dâ lingua tra li novi ginirazzioni.
Comu participari e nfurmazzioni utili
Participari ô “Simana dû Sicilianu” è sèmplici e apertu a tutti. La nizziativa è sviluppata attornu a tri pilastri funnamintali: parrari lu sicilianu ‘n pùbbricu e ncuraggiari l’àutri a farlu; studiari la lingua, la sò grammàtica, la sò storia e la sò littiratura; criari e cunnivìdiri cuntinuti ‘n sicilianu, sia chi fussi narrativa, vìdiu, saggi, matiriali didattici o àutri formi di sprissioni culturali.
Chiunque pò participari a l’eventu, sia online ca di pirsuna. Pî participanti virtuali, si pò usari l’hashtag ufficiali #simanadûsicilianu supra tutti li piattaformi suciali pi rènniri visìbbili lu sò cuntribbutu e tràsiri ntâ cumunità.
Pi cchiù nfurmazzioni e pi arrigistrari la tò participazzioni, è dispunìbbili lu situ ufficiali, unni pò cumpilari nu modulu pi ‘nnicari lu sò supportu e ‘nnicari comu ntenni participari a l’eventu.
Nun pèrdiri sta uccasioni ùnica pi cilibbrari e cuntribbuiri â rinascita dû sicilianu! Lu “Simana dû Sicilianu” è cchiù di nu sìmprici avvinimentu culturali: è nu muvimentu ca havi comu scopu di ripristinari dignitati e spazziu a na lingua ricca di storia e di idintitati, patrimoniu prizzabbili ca apparteni nun sulu â Sicilia, ma a tutta l’umanitati. Partecipari voli diri addivintari prutagunisti di na gintili rivoluzzioni curturali, ca pò trasfurmari lu futuru linguìsticu di l’isula e prisirvari una dê soi sprissioni cchiù autèntichi di identità.
