Lu cori baroccu di Palermu si pripara a dari l’accugghienza a “Un Tocco di Pace”, l’òpira di ciramica mprissiunanti ca rapprisintarà la Sicilia all’Expo 2025 di Osaka. La prisintazzioni di l’òpira munumintali, criata di 12 ciramisti siciliani sutta la cuntrullazzioni artìstica dû Maestru Domenico Boscia, si farà giovidìa 10 di aprili ê 10:00 ô Quattro Canti, ‘n prisenza dû sinnacu Roberto Lagalla e di l’arcivìscuvu Corrado Lorefice.
N’òpira monumintali tra tradizzioni e nnuvazzioni
“Un Tocco di Pace” nun è sulu n’òpira d’arti, ma nu veru e propiu manifestu culturali ca cilibbra l’idintitati siciliana prujittannula versu l’urizzunti ntirnazziunali. La mpunenti criazzioni, ca si stenni supra na supirfici di quattru metri quatrati, è fatta di petra làvica maiòlica e rapprisenta n’esempiu straurdinariu di l’eccillenza artiggianali di l’ìsula
La particularità di chistu travagghiu è ntâ fusioni di diversi tecnichi: dâ trasfurmazzioni dô vitru ê mpianti di argilla grezza e terracotta, finu â finitura raffinata nta l’oru puru veru ca cummogghia cchiù di nu metru quatratu dâ supirfici. Nu tribbutu â tecnica giappunisi dô kintsugi, ca cria simmòlicamenti nu ponti culturali cô paisi ospitanti di l’Expo 2025.
Lu pruggettu, addisignatu di “il Made in Sicily” di Giovanni Callea e Davide Morici, è fruttu di na cullabburazzioni senza pricidenti ca vitti la participazzioni di artiggiani dî principali citati siciliani di ciràmica, n’unioni di talenti chi tistimunia la ricchizza e la varietà dî tradizzioni artiggianali di l’ìsula.
Nu ditticu artisticu ca unisci la Sicilia e lu Giappuni
Ciò ca renni sta iniziativa ancora cchiù mpurtanti è ca fa parti di nu ditticu artisticu ca sarà cumplitatu di l’òpira “Grani di Pace”, ca è privista pi èssiri mustrata ntô Padiglioni Italianu a l’Expo Osaka dô 7 ô 14 di giugnu 2025. Nzemi, sti dui criazzioni custruisciunu nu ponti culturali tra Sicilia e Giappuni, funnatu supra l’arti, l’idintitati e nu mpegnu cumuni pâ paci.
“Un Tocco di Pace” rapprisenta quinni non sulu l’eccillenza artistica, ma macari nu putenti messaggiu di collaborazzioni e dialugu nterculturali, valuri particularmenti mpurtanti ntô cuntestu di n’esposizzioni univirsali.
Li prutagunisti dû travagghiu cullittivu
L’opira cullittiva vitti la participazzioni di artisti e ciramisti di diversi zoni dâ Sicilia: Anna Bacino, Maria Concetta D’Anna e Rita Manzullo dâ Bottega di Ciramica La Gioiosa a Burgio; Franco Volpe di Sciacca; Veronica Mancuso di Palermu; Stefano Anguzza di Caltagirone e Gran Michele; Nicolò Giuliano di Munriali; Filippo Lardizzone e Sara Todaro di Santo Stefano di Camastra; Joe Manganillo di Collesano. A lu pruggettu cuntribbuìu macari l’artista cuntimpuràniu Gaetano Barbarotto.
La manifistazzioni godi di la cullabburazzioni dû Cumuni di Palermu e dû patrunatu dî Cumuni di Munriali, Sciacca, Cullisanu, Motta d’Affermu, Santu Stèfanu di Camastra, tutti cità siciliani cu na forti tradizzioni ciràmica.
N’opportunità di nun pèrdiri
Doppu la prisintazzioni ufficiali a li Quattro Canti, “Un Tocco di Pace” sarà cullucatu ô Palazzu Risu di Palermu, unni arristarà espostu e accissìbbili ê visitatura nzinu a l’inizziu dî travagghi di rinnovamentu dû museu. N’uccasioni ùnica pi ammirari sta straurdinaria tistimunianza di l’arti ciràmica siciliana prima dû sò viaggiu ‘n Giappuni.
La prisintazzioni lu 10 di aprili rapprisenta n’abbinimentu nun pircàbbili pi l’amanti di l’arti e pi chiddi ca vulìssiru scòpriri comu la Sicilia ntirprita, attraversu la sò tradizzioni ciràmica millinaria, lu tema dâ paci e dû diàlugu tra li culturi. “Un Tocco di Pace” non è sulu n’òpira monumintali ma nu sìmmulu viventi di comu l’arti pò èssiri nu veiculu pi messaggi univirsali, capaci di uniri li diversi tradizzioni nta nu linguaggiu cumuni di biddizza e armunìa.
