N’inizziativa nicissària pî nostri tempi
Nta n’èbbica unni episodi di viulenza contra li donni cuntinuanu a rapprisintari n’emergenza suciali, inizziativi comu “Sicura di Te – Percorsi di Prevenzione e Difesa” addivèntanu nun sulu utili, ma nicissari. L‘eventu gratuitu, urganizzatu di l’associazzioni Quarto Tempo A.s.d./A.p.s., si farà sàbbatu 8 marzu 2025, ‘n occasioni dâ jurnata ntirnazziunali dâ fìmmina, ô centru culturali Xinergie di Chiazza Sant’Anna 3 di Palermu, di li 10:00 nzinu a li 13:00.
A criscenti friquenza ri aggrissioni e viulenza rinnìu sempri cchiù urgenti furniri â li donni strumenti cuncreti pâ sò sicurizza pirsonàli. “Sicura di Te” rispunni pricisamenti a sta necessità, uffrennu nu prugramma cumpletu ca cummina aspetti tiòrici e pràtici di l’autudifisa fimminili, cu n’approcciu multidisciplinari ca coinvolgi sperti di arti marziali, psicologgi e giurici.
Lu prugramma dittagghiatu di l’eventu
La matina accuminciarà ê 10:00 câ prisintazzioni di l’eventu e di l’associazzioni Quarto Tempo dû prisidenti Alessandro Valenziano, siguiti dî saluti istituzzionali di l’avvucatu Francesco Leone di l’AGIUS (Associazione Giuristi Siciliani) e la dutt. Federica Abbate di lu GTA (Guide Turistiche Autorizzate).
A li 10:15 Marco Carella, prufissuri di arti marziali, autudifisa e miditazzioni, tinni nu seminariu supra la sicurizza pirsunali e l’autudifisa, illustrannu strumenti pâ cunsapivulizza e la prutizzioni. Succissivamenti, ê 10:45, l’avvucati Giuseppe Ugo Abbate e Mariagrazia Giuliano affrontarunu l’aspetti ligali di l’autudifisa.
Lu prugramma cuntinuarà a li 11:00 cu Giulio Riggio, dû stòricu tabbacchista supra via Danti X, ca prisintarà artìculi spicìfici pâ difisa pirsunali. A li 11:15, la dutturi Valentina Sana, psicologa e psicoterapista, approfunnirà l’aspetti psicològgici di l’autudifisa fimminili.
Dopu na brevi pausa ê 11:30, l’eventu ripigghia ê 12:00 cu na lizziuni dimostrativa tinuta n’autra vota di Marco Carella, ca illustrarà tecnichi pràtichi di autudifisa e stratiggìi sèmplici ma efficaci pi difènnirisi ‘n casu di aggrissioni. L’eventu chiudi â 13:00.
Participazzioni e nfurmazzioni
La nizziativa, spunsurizzata di Xinergie, Quarto Tempo, Shinken Aikido Palermo, AGIUS e GTA, nascìu cu lu scopu di sensibilizzari lu pùbbricu supra l’impurtanza dâ sicurizza pirsunali, uffrennu ô stissu tempu strumenti cuncreti pi arricanusciri e affruntari situazzioni putinziarmenti piriculusi.
Nun perdiri sta priziosa opportunità pi ‘mparari e crìsciri: “Sicura di Te” rapprisenta nu passu cuncritu versu na maggiuri cunsapivulizza e autunumìa ntâ tò sicurizza pirsunali, pirchì comu dici lu suttatitulu di l’eventu, “La tò sicurizza accumincia cu tia. Partecipa e ‘mpara a difènniri te stissu!” Pi cchiù nfurmazzioni, si pò cuntattari lu nùmmaru 327 943 3563, puru tramiti WhatsApp.
