Letizia Battaglia nun è sulu nu nomu, ma nu sìmmulu. Sìmmulu di lotta, risistenza e prufunna sinzibbilità artìstica ca riniscìu a catturari, tràmiti la sò fotocamera, l’essenza cchiù cruda e autentica dâ sò terra, la Sicilia. La sò storia veni cuntata lu prossimu lunidìa, 6 di jinnaru, lu Rai 3, â tarda sira ê 23.10, cû ducumintàriu “Il mio nome è Battaglia”, diriggiutu dâ riggista francisi Cécile Allegra.
La pillìcula non è sulu nu tribbutu â fotugiurnalista palermitana, ma nu viaggiu ‘ntimu e ntirissanti attraversu sceni e tistimunianzi non pubbricati, ca rivèlanu lu latu cchiù umanu e prufissiunali di na figura ùnica ntô panorama fotugraficu munniali. “È impossibile pensare Palermo senza Letizia Battaglia. Palermo è Letizia e Letizia è Palermo”, dici la rigista, suttaliniannu lu ligami ‘ndissolubbili tra la città e la fotugrafa.
Ntô ducumintàriu, Allegra cunta lu sò primu ‘ncontu cu Battaglia ntô 2016, nna n’appartamentu ca pareva cuntari nu pezzu di storia pi iḍḍu stissu. Li mura addicurati cu fotugrafìi icònichi e scatuli di negativi allinchìunu ogni àngulu, tistimuniannu di na vita didicata a catturari la virità, per quantu dulurusa e scòmoda putissi èssiri. Grazzi â sò lenti janca e niura, Battaglia riniscìu a lluminari arcuni dî pàggini cchiù diffìcili dâ storia taliana cu nu putiri narrativu straurdinariu.
La rigista non esita a paragunari l’arti di Letizia Battaglia â padrunanza di Caravaggiu, grazzi â sò “scienza di l’ùmmira” ca amplifica lu dramma e la forza emutiva dî sò sceni. Lu jancu e lu nìuru addiventa accussì na lingua univirsali, capaci di discrìviri la dualità di nu paisi ntra luci e buio, ntra spiranza e dispirazzioni.
Chistu ducumintàriu è assài cchiù di nu sìmplici omaggiu: è n’invitu a scopriri, o riscupriri, lu travàgghiu e lu curàggiu di na fìmmina ca non s’avìa mai firmatu di cuntari la virità. La sò òpira grapìu l’occhi nun sulu di Palermu, ma di n’interu paisi, purtannu â luci virità ca tanti avissiru prifirutu ignurari
“Il mio nome è Battaglia” sarà n’eventu ‘nmincabbili pi chiunque voli èssiri cummovutu dâ storia di na vita straurdinaria, signata dâ ditirminazzioni e dâ passioni pâ fotografia. Na storia ca continua a ispirari e arricurdari lu putiri di l’immagini pi canciari lu munnu.
