Lu murali di Rusulia di Igor Scalisi Palminteri addivintau n’icona pi Palermu e oltri. Salìu ntê classifica dê Street Art Cities, arrivannu prima tra l’òpiri italiani e sesta ntô munnu. Chistu non è sulu nu triunfu artisticu, ma nu successu cullittivu. Parra dâ cumunità Sperone e di chiḍḍi ca travagghiaru cu passiuni pi ottèniri chistu risultatu. Di Sperone167 a VediPalermu, nzèmmula a tanti àutri rialtà lucali, “Rusulia” addivintau nu sìmmulu di rinascita pi nu quarteri ca s’ha dicisu di riscriviri la sò identità. Cu orgògliu e spiranza, Sperone mittìu fini a dicenni di degradu e abbannunu.
Palminteri, spiegò lu veru significatu di chista cunquista: “Non nigu ca spirava di vinciri, ma mi dumannai puru cosa significa veramenti vinciri. Si vinciri voli diri sulu èssiri u primu nnâ cuncurrenza, fussi ‘na suddisfazzioni pirsonàli, ma nenti di cchiù. Ma si vinciri voli diri dari vuci a na cumunità, cuntari la storia di nu subburgu ca voli canciari, allura iè, vincìumu. Chistu murali non è cchiù meu, è chiḍḍu di Sperone. È lu ritrattu di nu quarteri ca si arricanusci nta na nova identità, ca manna nu messaggiu forti: li cosi ponu canciari.”
Don Ugo Di Marzo, parrocu dâ Parrocchia di San Marcu Evangelista, cilibbrò cu entusiasmu sta vittoria: “Oggi vinci Igor comu artista, ma vinci puru la Parrocchia e tutta la cumunità Sperone, ca cummattìu nzèmmula a Aida Satta Flores pi criari st’òpira. Ma cu Spiruni vinci tuttu lu Palermu, e suprattuttu la nostra caru Santuzza!”
Rusulia è la dimostrazzioni ca l’arti havi lu putiri di trasfurmari la rialtà. Nu murali ca addiventa lu sìmmulu di nu quarteri ca riscopri la sò dignitati, mirannu a nu futuru di biddizza, spiranza e ditirminazzioni.
Lu pruggettu potti pigghiari vita grazzi ô mpurtanti sustegnu dâ Parrocchia di San Marcu Evangelista e â campagna prumuzzionali curata di Made in Sicily. Davide Morici e Giovanni Callea cuntunu cu orgogliu l’avvintura cullittiva ca coinvolse assài cittadini e rialtà lucali: “La campagna pô murali fu n’avvintura ca riuniu accussì tanti enirgìi splèndidi. Nu sinceru ringraziamentu a tutti li vutanti e a tutti chiddi ca ci accumpagnàru cu entusiasmu nta stu viaggiu. Vinciumu comu gruppu, ed è chiḍḍu ca importa.”
È privistu n’eventu spiciali pi mercuridìa 11 frivaru ê 17:00 ntâ via Sacco e Vanzetti, davanti ô murali, pi nu mumentu di cilibbrazzioni di chista straordinaria cunquista cullittiva.
